Böyük Britaniyanın Motor İstehsalçıları və Ticarətçiləri Birliyi (SMMT) aprel ayında Böyük Britaniyanın avtomobil bazarı ilə bağlı hesabat yayımlayıb. Hesabata görə, koronavirus pandemiyası səbəbindən istehsal müəssisələrinin bağlanması ilə aprel ayında ölkədə avtomobil istehsalı rekord səviyyədə geriləyərək 197-yə enib. Qeyd edək ki, ötən ilin aprel ayında Böyük Britaniyada avtomobil istehsalı 71 mini üstələyib.
Ümumilikdə, 2020-ci il üzrə ölkədə avtomobil istehsalı həcminin 870 mini keçməyəcəyi ehtimal edilir. Ən son, 2009-cu ilin maliyyə böhranı dövründə buna yaxın göstərici (999 min 460 avtomobil) qeydə alınıb. 2009-cu il istisna olmaqla, ölkədə avtomobil istehsalı 1980-ci ildən bu yana 1 milyon ədədin altına düşməyib.
“Nissan” şirkətinin Sanderlend şəhərində yerləşən nəhəng istehsal zavodu da daxil olmaqla, bir sıra zavodların yenidən istehsala açıldığı nəzərə alındıqda, sözügedən göstəricinin növbəti aylarda pilləli olaraq artması ehtimal edilir.