Əmlak Məsələləri Dövlət Komitəsinin rəhbərliyi bölgələrdə vətəndaş qəbulu keçirəcək

Azərbaycan Respublikasının Prezidenti İlham Əliyevin tapşırığına əsasən vətəndaşların təklif, irad və müraciətləri ilə yerindəcə tanış olmaq üçün mərkəzi icra hakimiyyəti orqanları rəhbərlərinin və onların müavinlərinin bölgələrdə vətəndaşların qəbulu cədvəlinə uyğun olaraq, Əmlak Məsələləri Dövlət Komitəsinin rəhbərliyi Şirvan şəhəri, Sabirabad və Neftçala rayonlarında vətəndaş qəbulu keçirəcək. Vətəndaş qəbulu 30 noyabr tarixində saat 10:00-da Sabirabad və Neftçala rayonlarında, saat 12:00-da isə Şirvan şəhərində keçiriləcək. Qəbullar regionlarda yerləşən Heydər Əliyev Mərkəzlərində baş tutacaq.

Qəbul zamanı komitənin aidiyyəti struktur bölmələrinin rəhbərlərinin iştirakı ilə fəaliyyət istiqaməti üzrə, o cümlədən daşınmaz əmlakın qeydiyyatı, torpaqların kadastrı, dövlət əmlakının özəlləşdirilməsi, hərraclarda iştirak, dövlət əmlakının icarəyə götürülməsi, torpaqların texniki parametrlərinin və koordinatlarının müəyyənləşdirilməsi, ünvan məsələləri və bu sahədə bölgələrdə əhalini maraqlandıran digər məsələlərlə bağlı vətəndaşların müraciətlərinə baxılacaq.

Qəbulda yuxarıda qeyd olunan rayondan olan vətəndaşlar iştirak edə bilər və yalnız komitənin fəaliyyət sahələrinə aid olan müraciətlərə baxılacaq.

© Materiallardan istifadə edərkən hiperlinklə istinad olunmalıdır