2025-ci ilin oktyabr ayında ölkədə istehlak qiymətləri indeksi ötən ilin müvafiq dövrü ilə müqayisədə 105,9% təşkil edib. Dövlət Statistika Komitəsindən verilən məlumata görə, bu artım qida məhsulları, alkoqollu içkilər və tütün məmulatları üzrə 108,2%, qeyri-qida məhsulları üzrə 102,5%, əhaliyə göstərilmiş ödənişli xidmətlər üzrə isə 105,6% olub.
Aylıq müqayisədə 2025-ci ilin oktyabr ayında istehlak qiymətləri indeksi 0,5% artıb. Yanvar–oktyabr dövründə isə inflyasiya əvvəlki ilin eyni dövrü ilə müqayisədə 105,7% səviyyəsində qeydə alınıb.
Qida məhsullarında dəyişikliklər
Oktyabr ayında qida məhsullarının qiymətləri əvvəlki aya nisbətən 0,8% artıb, ilk on ayda isə ötən ilin analoji dövrünə nisbətən 106,9% təşkil edib.
Ən çox bahalaşma aşağıdakı məhsullarda müşahidə olunub:
-
qarabaşaq yarması
-
mal və qoyun əti
-
ət konservləri
-
balıq və balıq məhsulları
-
yumurta
-
ayran, kəsmik, pendir, kərə yağı
-
banan, armud, fındıq
-
pomidor, şirin bibər, badımcan
-
süfrə çuğunduru, yerkökü, kartof
-
şokolad məmulatları
-
qara və yaşıl çay
Ən çox ucuzlaşan məhsullar isə limon, portağal, narıncı, alma, heyva, nar, xurma, üzüm, kivi, qoz, şabalıd, göyərti, balqabaq, sarımsaq və soğan olub.
Qeyri-qida məhsullarında qiymətlər
Qeyri-qida məhsullarının qiymətləri oktyabrda aylıq müqayisədə 0,3%, yanvar–oktyabrda isə illik müqayisədə 2,6% artıb.
Daha çox bahalaşma geyimlərdə, şəxsi gigiyena vasitələri və zərgərlik məmulatlarında, ucuzlaşma isə yuyucu və təmizləyici vasitələrdə qeydə alınıb.
Ödənişli xidmətlərdə qiymət dəyişiklikləri
Əhaliyə göstərilən ödənişli xidmətlər üzrə qiymətlər oktyabr ayında əvvəlki aya nisbətən 0,4%, ilin ilk on ayında isə ötən ilin müvafiq dövrü ilə müqayisədə 106,6% təşkil edib.
Bahalaşma əsasən aşağıdakı xidmətlərdə müşahidə olunub:
-
mənzillərin kirayəsi
-
metro, taksi və avtobus sərnişindaşıması
-
restoran və kafelərin iaşə xidmətləri
Ucuzlaşma isə hava nəqliyyatı ilə beynəlxalq sərnişindaşıma xidmətlərində qeydə alınıb.
Digər kateqoriyalar üzrə ciddi qiymət dəyişiklikləri müşahidə olunmayıb.