ABŞ bir sıra ölkələrə 10%-lik gömrük rüsumu tətbiq edəcək.
BBN.az xəbər verir ki, ABŞ maliyyə naziri Skott Bessentin açıqlamasına görə, Vaşinqtonla yaxşı niyyətlə ticarət danışıqları aparan ölkələrə 10% gömrük rüsumu tətbiq olunacaq.
“Prezident vicdanla danışıqlar aparan tərəfləri mükafatlandırmaq istəyir. Məncə, təxminən 100-ə yaxın ölkə olacaq ki, onlar minimum 10%-lik cavab rüsumunu alacaqlar, sonra isə vəziyyətə baxacağıq”, — deyə Bessent bildirib.
Nazirin sözlərinə görə, iyulun 9-na qədər olan müddətdə ABŞ və digər ölkələr arasında yeni ticarət razılaşmalarının əldə olunacağı gözlənilir.
Xatırladaq ki, aprelin 2-də ABŞ prezidenti Donald Tramp 185 ölkə və ərazidən idxal olunan məhsullara gömrük rüsumları tətbiq ediləcəyini elan etmişdi. 10%-lik universal tariflər aprelin 5-dən, fərdi tariflər isə aprelin 9-dan qüvvəyə minib.
Həmin gün Tramp bəzi cavab rüsumlarının 90 gün müddətinə dayandırıldığını və bu müddət ərzində 10%-lik tarifin qüvvədə qalacağını bildirmişdi. İyunun 27-də isə prezident açıqlayıb ki, ABŞ yaxın bir həftə yarım ərzində ayrıca sazişlərin imzalanmayacağı ölkələrə gələcək ticarət şərtləri və gömrük rüsumu dərəcələri barədə məlumat verəcək.