ABŞ Federal Ehtiyat Sistemi (FED) Açıq Bazarlar üzrə Federal Komitəsinin (FOMC) növbəti iclasının yekunlarına dair bəyanat yayımlayıb.
BBN.az xəbər verir ki, açıqlamada mövcud göstəricilərin iqtisadi fəallığın sabit templə artmaqda davam etdiyini göstərdiyi bildirilir. Qeyd olunur ki, məşğulluq artımı zəif olaraq qalır, işsizlik səviyyəsində isə müəyyən sabitləşmə əlamətləri müşahidə edilir. İnflyasiya isə hələ də nisbətən yüksək səviyyədədir.
Komitə uzunmüddətli dövrdə maksimal məşğulluğun təmin edilməsini və inflyasiyanın 2 faiz səviyyəsində saxlanılmasını əsas məqsəd kimi müəyyən edib. İqtisadi perspektivlə bağlı qeyri-müəyyənliyin yüksək olaraq qaldığı vurğulanır. Bildirilir ki, Komitə ikili mandat – məşğulluq və qiymət sabitliyi – üzrə riskləri diqqətlə izləyir.
Bu məqsədlərə dəstək olaraq, Komitə federal fondlar üzrə əsas faiz dərəcəsinin 3,5–3,75 faiz aralığında saxlanılması barədə qərar qəbul edib. Gələcəkdə faiz dərəcələrinə mümkün dəyişikliklərin miqyası və vaxtı müəyyən edilərkən daxil olan iqtisadi məlumatlar, formalaşan gözləntilər və risk balansı diqqətlə qiymətləndiriləcək.
FED bəyan edib ki, maksimal məşğulluğun dəstəklənməsinə və inflyasiyanın 2 faiz hədəfinə qaytarılmasına sadiqdir.
Pul-kredit siyasətinin mövqeyi qiymətləndirilərkən Komitə daxil olan məlumatların iqtisadi perspektivlərə təsirini davamlı olaraq izləyəcək. Əgər məqsədlərə çatmağa mane ola biləcək risklər yaranarsa, siyasətin istiqamətinə düzəliş edilə bilər. Qiymətləndirmələr əmək bazarının vəziyyəti, inflyasiya təzyiqləri və gözləntilər, eləcə də maliyyə və beynəlxalq inkişaflar daxil olmaqla geniş məlumat bazasına əsaslanacaq.
Qərarın lehinə səs verənlər Jerome H. Powell (Sədr), John C. Williams (Sədr müavini), Michael S. Barr, Michelle W. Bowman, Lisa D. Cook, Beth M. Hammack, Philip N. Jefferson, Neel Kashkari, Lorie K. Logan və Anna Paulson olub.
Qərarın əleyhinə səs verən Stephen I. Miran və Christopher J. Waller isə iclasda federal fondlar üzrə faiz dərəcəsinin 0,25 faiz bəndi azaldılmasını təklif ediblər.