Albaraka Türk Katılım Bankası-nın texnoloji qolu olan AlbarakaTech Global, 2025-ci ildə süni intellekt əsaslı məhsullar, açıq bankçılıq həlləri və mobil təhlükəsizlik sistemləri ilə maliyyə sektorunda mövqeyini gücləndirməyi hədəfləyir.
BBN.az xəbər verir ki, şirkətin CEO-su Ali Tuğlu Fintechtime jurnalına müsahibəsində bildirib ki, süni intellekt bank xidmətlərində yeni mərhələ açır. Onun sözlərinə görə, bu texnologiya müştəri təcrübəsinin fərdiləşdirilməsindən risklərin idarə olunmasına qədər bir çox sahədə səmərəliliyi artırır.
AlbarakaTech-in hazırda təqdim etdiyi əsas həllər arasında mobil təhlükəsizlik məhsulu Guard, blokçeyn əsaslı əməkdaş loyallıq platforması myco, açıq bankçılıq üçün API Gateway və sənəd idarəetməsində süni intellekt əsaslı imza tanıma sistemləri yer alır. Bu həllər hazırda 11 bank və 2 maliyyə qurumunda tətbiq edilir.
Tuğlu qeyd edib ki, açıq bankçılıq şirkətin əsas prioritetlərindəndir. 2024-cü ilin sonunda AlbarakaTech-in API platforması həm yerli, həm də beynəlxalq səviyyədə dörd mühüm mükafata layiq görülüb.
Şirkət həmçinin Albaraka Garaj və Insha Ventures vasitəsilə startap ekosistemini dəstəkləyir. Bu təşəbbüslər çərçivəsində 120-dən çox gənc startap maliyyə və texnologiya resurslarına çıxış imkanı qazanıb.
Mütəxəssislər hesab edirlər ki, AlbarakaTech-in süni intellekt və açıq bankçılıq sahəsində atdığı addımlar regionda rəqəmsal bankçılığın inkişafına ciddi təsir göstərəcək.