Son illər müşahidə olunan qeyri-sabit hava şəraiti, güclü yağışlar, sel-subasma, dolu və sair hallar kənd təsərrüfatına da xeyli zərər vurur. Fermerlərin zərərlərini qarşılamaq, davamlı fəaliyyətini təmin etmək məqsədilə yaradılmış Aqrar Sığorta Fondu bu işdə müstəqil aqrar sığorta ekspertlərinin xidmətindən istifadə edir.
Qanunvericiliyə əsasən 70-dən artıq ixtisas sahibi Aqrar Sığorta Fondunun təlimlərində iştirak etdikdən sonra Dövlət İmtahan Mərkəzində təşkil olunan imtahandan keçərək aqrar sığorta eksperti kimi fəaliyyətə başlaya bilər.
Hazırda müvafiq prosedurları tamamlayaraq sertifikat əldə edən onlarla mütəxəssis aqrar sığorta eksperti kimi Fondla əməkdaşlıq edir.
Son vaxtlar aqrar sığortaya inamın artması, təsərrüfatların sığortalanması zərurətinin yaranması ilə müstəqil aqrar sığorta ekspertlərinin işinə də tələbat artıb.
Yerli və xarici ekspertlərin təcrübəsini mənimsəyərək bu sahədə fəaliyyət göstərən ekspertlər arasında artıq qadın mütəxəssis də var.
Aqrar Sığorta Fondunun təlimlərində iştirak edərək sertifikat almış Pərvanə Əsədova ölkəmizdə ilk müstəqil aqrar sığorta eksperti sayılır.
Bitkiçilik sahəsində fəaliyyət göstərən xanım ekspert qısa müddətdə ölkənin çoxsaylı rayonlarına ezam olunaraq taxıl, qarğıdalı sahələrinə, meyvə bağlarına baxış keçirərək fermerlərə dəymiş zərərləri hesablayıb.
İlk qadın aqrar sığorta eksperti hesab edir ki, bu sahə sərbəst iş rejimi, iş saatlarının planlaşdırılması və qazanc baxımından qadınlara daha uyğundur. O müvafiq ixtisas sahibi olan qadınlara özlərini bu sahədə sınamağı tövsiyə edib: «Aqrar sığorta sahəsi olduqca faydalı və maraqlıdır. Fermerlərə dəyən zərərin hesablanması və ona uyğun ödənişin edilməsi aqrar sahəyə böyük dəstəkdir. Eyni zamanda bu xanım mütəxəsislərin sərbəst iş rejimində işləyərək yüksək gəlir əldə etməsinə imkan yaradır».
Qeyd edək ki, son vaxtlar kənd təsərrüfatı sahəsində hadisələrin çoxalması sərbəst qrafiklə işləyən aqrar sığorta ekspertlərinin işlərinin və gəlirlərinin artmasına səbəb olub.
Hazırda Aqrar Sığorta Fondunun təlimlərinə qatılan qadın ekspertlərin sayı artmaqdadır. Artıq 10-a yaxın xanım ekspert imtahanı uğurla verərək müstəqil ekspert sertifikatı alıb və yaxın vaxtlarda müstəqil sığorta eksperti kimi fəaliyyətə başlayacaqlar.