Dünyada ən çox sıxlıqla istifadə edilən valyuta dollar olub. Belə ki, avqust ayı ərzində SWIFT banklararası tranzaksiyalarının həcminə istinadən, ümumi tranzaksiyaların 40%-dən artığını ABŞ dolları ilə həyata keçirilən tranzaksiyalar təşkil edib. Bu iyul ayı göstəricilərinə nisbətdə 0.66% artım deməkdir.
Siyahıda ikinci yerdə qərarlaşan avro valyutasının tranzaksiyalarda istifadə həcmi isə əksinə 0.48% azalaraq, 37.95% səviyyəsində qərarlaşıb. Üçüncü yerə isə, 0.27% geriləmə ilə ingilis funt-sterlinqi (5.72%) layiq görülüb.
Siyahının ilk onluğu, Yaponiya yeni (2.73%), Çin yuanı (2.15%), Kanada dolları (1.62%), Avstraliya dolları (1.3%), Honk Konq dolları (1.28%), Sinqapur dolları (0.91%) və Tayland batı (0.8%) ilə tamamlanıb.
Rusiyanın rəsmi valyutası olan rubl isə 2015-ci ildən bu yana ilk dəfə 0.18%-lik göstərici ilə siyahının ilk 20-liyində qərarlaşıb. Buna əsas səbəb kimi, ölkənin uçot dərəcəsində artım və bir neçə xarici ölkə ilə rubl vasitəsilə idxal-ixrac əməliyyatlarının aparılması göstərilir.