Çinin Alibaba Qrupunun onlayn alış-veriş xidməti AliExpress Avropa Komissiyasının yenidən radarındadır. Komissiya, qeyri-qanuni satışa təqdim etdiyi məhsullar səbəbilə AliExpress-ə qarşı araşdırma başlatdığını açıqladı. Sözügedən araşdırma sosial media platforması X və TikTok-dan sonra üçüncü belə araşdırma olaraq qeydə alınıb.
BBN.az bu baradə Blumberg Türkiyə’yə istinadən xəbər verir.
Qlobal illik dövriyyəsinin 6 faizi həcmində cərimə ödəmək riski ilə üzləşən AliExpress, fəaliyyət göstərdiyi bazarlarda tətbiq olunan bütün qayda və qanunlara əməl etdiyini iddia edib.
Aİ-nin Rəqəmsal Xidmətlər Aktı (DSA) çərçivəsində AliExpress, digər 15 texnoloji şirkətlə birlikdə öz platformasında qeyri-qanuni və zərərli məzmunla mübarizə aparmaq üçün daha çox işlər görməlidir. Aİ rəsmiləri noyabr ayında bu barədə AliExpress-dən məlumat istəmişdilər.
Komissiya rəsmiləri saxta dərmanlar, yararsız qidalar və pəhriz əlavələri kimi qeyri-qanuni məhsulların AliExpress-də yayılması potensialından və onlarla mübarizə üçün effektiv tədbirlərin görülməməsindən narahat olduqlarını bildiriblər.