Koronavirus pandemiyası öz təsirlərini tədricən göstərməyə başladığından etibarən Avropa ölkələrinin, xüsusilə Cənubi Avropa ölkələrinin diqqəti Avropa Birliyindən gələcək dəstək planına yönəlib. Lakin, Avropa Birliyinin (EU) maliyyə baxımından daha güclü ölkələri olan Almaniya, Niderland, Avstriya və digərləri, İspaniya, İtaliya, Fransa kimi pandemiyanın mərkəzinə çevrilən və böyük itkilərlə üzləşən ölkələrə yardım etməkdə gecikirlər. Bu isə, öz növbəsində Avropa Birliyi həmrəyliyini sual altında qoyur.
İtaliya, İspaniya, Fransa və digər ölkələr ilkin olaraq birlik tərəfindən sığortalanan “korona istiqrazları”nı dövriyyəyə buraxmağı təklif etmişdi. Lakin, Almaniya kansleri Angela Merkel tərəfindən Avropa liderlərinin virtual görüşündə ortaq borc aləti fikirlərinin istifadəyə verilməsindən imtina edildi.
Avropa Mərkəzi Bankı (ECB) tərəfindən bu yaxınlarda 750 milyard avro həcmində stimullaşdırıcı paket layihəsi başladılıb və bu paket özündə həmçinin hökumətlərin istiqrazlarının satın alınmasını da cəmləşdirir. Lakin, koronavirus pandemiyasının gün keçdikcə daha geniş radiusda yayılması səbəbindən bunun Avropa ölkələrinə kifayət etmədiyi qənaətinə gəlinib.
Həmçinin, Avropa Komissiyası (EC) üzvlərin götürə biləcəkləri borc həcminə qoyduğu limiti aradan qaldırdığını açıqlayıb. Bununla belə, İtaliya, Yunanıstan kimi borclarının ÜDM-dən artıq olduğu ölkələr kreditorlardan maliyyə vəsaiti cəlb etməyə çətinlik çəkdiklərindən bu qərar da öz əhəmiyyətini itirib.
Avropa ölkələri arasında iqtisadi və siyasi təzyiqlərin artdığı dövrdə Brüsseldən müsbət xəbər gəlib. Belə ki, Avropa Birliyinin başlıca ölkələrindən üç rəsmi şəxs “CNBC”-yə ortaq qərarın əldə edilməsində əhəmiyyətli irəliləyişin əldə olunduğunu və yaxın zamanda dəstək proqramının başladıla biləcəyini açıqlayıb.
Dəstəyin isə, 2012-ci ildə yaradılan və fövqəladə vəziyyət halında istifadəsi nəzərdə tutulan Avropa Stabillik Mexanizmi (ESM) vasitəsilə ayrılacağı gözlənilir.