Dünya ölkələrinin rəqəmsallaşmaya doğru illərdir sürətlə irəliləməsinə baxmayaraq, kriptovalyutalar hələ də bir çox istehlakçılara qaranlıq qalmaqdadır. Bununla belə, ildən ilə kriptovalyutadan istifadə daha geniş məcrada yayılmağa davam edir. Ən sıx istifadənin müşahidə olunduğu regionlardan biri də Avropadır.
Avropa ölkələrində kriptovalyutadan istifadənin asanlaşdırılması məqsədilə daha bir innovativ layihəyə imza atılıb. Kanada mərkəzli ödəniş texnologiyaları şirkəti “Nuvei” Avropa Birliyinə daxil olan ölkələrdə və Böyük Britaniyada istifadəsi mümkün olan kriptovalyuta debit plastik kartları buraxıb. Törəmə qurumu olan “Simplex” vasitəsilə buraxılan bu kartlarda müxtəlif ənənəvi valyutalarla yanaşı, kriptovalyutalarda da vəsait saxlamaq və istənilən zaman çevirmək mümkündür.
Qeyd edək ki, “Simplex” şirkətinin hazırki bazar dəyəri 250 milyon dollardan yüksəkdir və sözügedən “crypt-to-fiat” plastik kartlarının hazırlanması prosesi “Visa” şirkəti ilə əməkdaşlıq çərçivəsində həyata keçiriləcək.
