Helsinki, 30 sentyabr – Avropa Mərkəzi Bankının prezidenti Kristina Lagarde avrozonanın ABŞ tərəfindən tətbiq olunan tariflərə gözləniləndən daha yaxşı dözümlü olduğunu və inflyasiya risklərinin “xeyli nəzarət altındadır” deyə bildirib.
BBN.az xəbər verir ki, Kristina Lagarde qeyd edib ki, Avropa Mərkəzi Bankı iyun ayından bəri faiz dərəcələrini sabit saxlayıb və iqtisadiyyatın dayanıqlı olması, eləcə də inflyasiyanın 2%-lik hədərə yaxın qalması səbəbindən əlavə sərt tədbirlərə tələsmir. Onun sözlərinə görə, faiz dərəcələrinin hazırda 2% səviyyəsində olması inflyasiya riskləri dəyişsə və ya yeni şoklar baş versə, çevik reaksiya vermək üçün yaxşı baza yaradır.
Avropa Mərkəzi Bankının prezidenti ticarət gərginliklərinin yeni inflyasiya təzyiqləri yaratmadığını vurğulayıb və bildirib ki, bu səbəbdən iqtisadi artımın dayanması ilə inflyasiyanın artması arasında klassik siyasət dilemma ilə üzləşmir.
O əlavə edib ki, əvvəlcə ticarət münaqişələrindən daha güclü təsirlər gözlənilsə də, real nəticələr daha mülayim olub. Təchizat zəncirlərində ciddi pozuntular yaşanmayıb, hökumətlər iqtisadiyyatı dəstəkləmək üçün əlavə xərclər edib, Avropa İttifaqı qarşılıqlı sanksiyalar tətbiq etməyib, eyni zamanda avro gözlənilmədən güclənib.
Kristina Lagarde ticarət tariflərinin ABŞ-ın qlobal maliyyə sistemindəki mövqeyinin yenidən qiymətləndirilməsi ilə üst-üstə düşdüyünü bildirib və investorların ABŞ dollarının “ultimativ təhlükəsiz valyuta” statusunu şübhə altına aldığını vurğulayıb.
Hökumətlərin müdafiə xərclərini artırması da iqtisadi artım üçün müsbət amil kimi qiymətləndirilib. Lagarde qeyd edib ki, 2025-2027-ci illərdə hökumət investisiyalarının iqtisadi artıma 0,25 faiz bəndi əlavə etməsi gözlənilir ki, bu da ticarət şoklarının təxminən üçdə birini kompensasiya edəcək.