Azərbaycanda proaktiv dövlət xidmətlərinə keçid və bütün dövlət xidmətlərinin “Mygov” və “Mygov Biznes” platformaları (portal və mobil tətbiqlər) vasitəsilə göstərilməsi nəzərdə tutulur.
Bu məsələ İlham Əliyev-in təsdiqlədiyi “Rəqəmsal inkişafın sürətləndirilməsinə dair 2026−2028-ci illər üçün Fəaliyyət Planı”nda əksini tapıb.
Əsas istiqamətlər
Sənədə əsasən, aşağıdakı tədbirlərin həyata keçirilməsi planlaşdırılır:
-
“Vahid məlumat idarəçiliyi” yanaşmasının tətbiqi;
-
Məlumatların dövlət orqanları tərəfindən alınmasında “yalnız bir dəfə” prinsipinin reallaşdırılması;
-
Vençur maliyyələşmə və kraudfandinq münasibətlərinin hüquqi tənzimlənməsi;
-
“Mələk investorlar” institutunun təşviqi;
-
Texnoparklarda rezidentlik şərtlərinin sadələşdirilməsi və yerli innovativ məhsulların dövlət satınalmalarında dəstəklənməsi;
-
Qlobal istedadların cəlbi üçün “rəqəmsal səyyah” vizasının tətbiqi və miqrasiya prosedurlarının sadələşdirilməsi;
-
Müstəqil mütəxəssislərin hüquqi statusunun müəyyən edilməsi;
-
İKT, süni intellekt və informasiya təhlükəsizliyi üzrə kadr potensialının gücləndirilməsi;
-
Dövlət informasiya ehtiyatlarının və sistemlərinin “Hökumət buludu”na tam miqrasiyası;
-
Maliyyə xidmətlərinin rəqəmsallaşdırılması;
-
Elektron ticarət və informasiya təhlükəsizliyi üzrə normativ-hüquqi bazanın yenilənməsi.
Strateji hədəflər
Fəaliyyət Planı ölkədə rəqəmsal inkişaf üzrə prioritet istiqamətləri müəyyənləşdirərək strateji məqsədlərə nail olmağı hədəfləyir.
Növbəti 10 ildə:
-
İKT sektorunun qeyri-neft-qaz ÜDM-də payının artırılması,
-
Rəqəmsal məhsul və xidmətlərin illik ixracının yüksəldilməsi,
-
Proaktiv xidmətlərin payının 50 %-ə çatdırılması,
-
Azərbaycanın beynəlxalq reytinqlərdə mövqeyinin əhəmiyyətli dərəcədə yaxşılaşdırılması
planlaşdırılır.
Sənəd dövlət–özəl sektor əməkdaşlığının gücləndirilməsi, akademik və elmi tədqiqatların inkişafı, startap və innovasiya ekosisteminin dəstəklənməsi kimi istiqamətlərə də xüsusi önəm verir və ölkənin innovasiya əsaslı, rəqabətqabiliyyətli iqtisadiyyata keçidini sürətləndirməyi qarşıya məqsəd qoyur.