Kriptovalyuta sahəsində fəaliyyət göstərən ən böyük kriptomübadilə platforması “Binance” yeni layihəsini ictimaiyyətə açıqlayıb. Rusiya və Ukrayna arasında fevral ayının sonlarında başlayan münaqişələrin ilkin mərhələsindən fəaliyyətə başlayan “Binance” bu dəfə Ukraynadan qaçqın düşən şəxslərə özəl kripto kartlar hazırlayıb.
“Contis” maliyyə platforması, “Palianytsia” və “Rotary” xeyriyyə qurumları ilə tərəfdaşlıq nəticəsində hazırlanan kripto kartlar qaçqın düşmüş şəxslərə kriptovalyuta göndərmək və qəbul etmək, habelə kriptovalyutalardan istifadə edərək alış-veriş etməyə imkan tanıyacaq.
Kripto tranzaksiyalar həyata keçirmək imkanı ilə yanaşı, bu kartları əldə edən şəxslər “Binance” tərəfindən üç ay ərzində aylıq 75 BUSD (Binance dolları = ABŞ dolları) məbləğində maliyyə dəstəyi əldə edəcəklər.
Məlumat üçün qeyd edək ki, təqribi bir ay əvvəl “Binance” Ukrayna Respublikasına rəqəmsal aktivlər ilə 2.5 milyon dollar dəyərində ianə dəstəyi göstərib.