Böyük Britaniya Rusiya ilə bağlı sanksiya siyahısını genişləndirərək ora bir neçə iri neft-qaz şirkətini daxil edib. Sanksiyalara “Tatneft” (MOEX: TATN), “Russneft”, “NNK-Oil” və “Russnefteqaz” məruz qalıb.
Məlumata görə, ümumilikdə sanksiya siyahısına 24 fiziki və hüquqi şəxs əlavə edilib. Böyük Britaniya hökumətinin rəsmi saytında dərc olunan bildirişdə qeyd olunur ki, siyahıya Birləşmiş Ərəb Əmirliklərində qeydiyyatdan keçmiş “Saphira Energy” şirkəti, həmçinin “Redwood Global Supply” və “Tejarinaft” treydinq şirkətləri də daxil edilib.
Bununla yanaşı, bu gün Avropa İttifaqı (Aİ) də Rusiya ilə bağlı sanksiya siyahısını genişləndirib. Yeni məhdudiyyətlər Rusiyanın “kölgə donanması”na aid daha 41 gəmiyə şamil olunub.
Xatırladaq ki, Aİ oktyabr ayında Rusiyaya qarşı 19-cu sanksiyalar paketini qəbul edib. Həmin paket çərçivəsində Rusiya bankları, kriptovalyuta birjaları, eləcə də Hindistan və Çində fəaliyyət göstərən bir sıra təşkilatlar sanksiya siyahısına salınıb. Eyni zamanda “Rosneft” və “Qazprom Neft” şirkətləri ilə bağlı əməliyyatlara tətbiq olunan məhdudiyyətlər də sərtləşdirilib.