Baş nazirin müavini, Azərbaycan-Çin Hökumətlərarası Komissiyasının həmsədri Şahin Mustafayevin rəhbərlik etdiyi nümayəndə heyətinin Çinə səfəri çərçivəsində sentyabrın 9-da Çendu şəhərində Ələt Azad İqtisadi Zonasının Səlahiyyətli Qurumu ilə Çinin yüksək texnologiyalı şirkətlərindən olan Sichuan Sunsync Photovoltaic Technology Co., Ltd. arasında günəş panelləri istehsalı müəssisəsinin yaradılması üzrə İnvestisiya Sazişi imzalanıb.
Sənədi Ələt Azad İqtisadi Zonasının Səlahiyyətli Qurumunun İdarə Heyətinin sədri Valeh Ələsgərov və şirkətin təsisçisi və sədri Sie Yi imzalayıb.
Sazişə əsasən, şirkət zonada 23 hektar ərazidə üç müasir istehsal müəssisəsi inşa edəcək. Burada illik 3 giqavat gücündə günəş panelləri, silisium kristalları və digər komponentlər istehsal olunacaq. Məhsulların əksər hissəsi ixrac olunacaq, həmçinin Ələt Azad İqtisadi Zonasında inşa ediləcək Günəş Elektrik Stansiyasının tikintisində də istifadə ediləcək.
Layihə Azərbaycanın bərpaolunan enerji üzrə strateji mərkəz kimi mövqeyini gücləndirməklə yanaşı, Çin şirkətlərinin zonaya marağının artmasına da şərait yaradacaq.
Qeyd edək ki, aktivləri 1,7 milyard ABŞ dolları olan Sichuan Sunsync günəş panellərinin istehsalı sahəsində qısa müddətdə qabaqcıl şirkətlərdən birinə çevrilib. Xatırladaq ki, Azərbaycan Prezidenti İlham Əliyev Çinə işgüzar səfəri zamanı şirkətin rəhbərini qəbul edərək müəssisənin yaradılması ilə bağlı məsələləri müzakirə etmişdi.