Azərbaycanda müəyyən istisnalar nəzərə alınmaqla sahibkarlıq sahəsində yoxlamaların birdəfəlik dayandırılması məsələsi nəzərdən keçirilə bilər.
Bu təklif Milli Məclisin bu gün keçirilən plenar iclasında deputat Aydın Mirzəzadə tərəfindən səsləndirilib.
Deputat bildirib ki, sahibkarlar artıq 12 ildir yoxlamalar olmadan fəaliyyət göstərirlər və bu mexanizmin sistem halına salınması mümkündür.
“Bəlkə bunu sistem halına salaq? Onsuz da sahibkarlar 12 ildir ki, yoxlama olmadan öz fəaliyyətlərini davam etdirirlər. Əlbəttə, bu bir təklifdir və qəbul olunub-olunmayacağını müvafiq strukturlar müəyyən edəcək. Amma bu təşəbbüs Azərbaycan sahibkarlarını daha geniş fəaliyyət göstərməyə, dövlətin qayğısı ilə yeni iş yerləri açmağa sövq edəcək”, – deyə Aydın Mirzəzadə qeyd edib.