Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən daha 150-yə yaxın işsiz şəxs peşə hazırlığı kurslarına cəlb edilib.
Agentliyin Bakı Peşə Hazırlığı Mərkəzində təşkil edilən kurslarda müdavimlərə qənnadçı, şirniyyatçı, dərzi, elektrik avadanlıqlarına xidmət və təmir üzrə elektrik montyoru, istilik şəbəkəsi avadanlıqlarının təmiri üzrə çilingər, mühafizəçi, ərzaq və qeyri-ərzaq malları satıcısı, nəzarətçi-xəzinədar və s. peşələr öyrədiləcək.
Onlara zəruri nəzəri biliklər tədris edilməklə yanaşı, öyrəndikləri peşələr üzrə təcrübə keçmələrinə də şərait yaradılacaq.
Təlimlər başa çatdıqdan sonra imtahanlardan müvəffəqiyyətlə keçən məzunlara sertifikat təqdim ediləcək və onlar işlə təmin olunacaqlar.
Tədris müddətində müdavimlərə minimum əməkhaqqı qədər aylıq təqaüdlər də ödənəcək.