Koronavirus pandemiyasının dünya iqtisadiyyatında özünü ən çox biruzə verdiyi sahələrdən biri də yarımkeçiricilərdir. Yarımkeçiricilərin istehsalında axsamalar nəticəsində yaranan qıtlıq səbəbindən bir çox beynəlxalq elektronika istehsalçıları tələbi qarşılaya bilmirlər. Ötən il smartfon satışlarında 7%-lik gerilməyə gətirib çıxaran bu tendensiya “Ford”, “Volkswagen” kimi bir sıra nəhəng avtomobil istehsalçılarının da istehsal həcmini azaltmasına səbəb olub.
İngiltərə mərkəzli beynəlxalq strateji konsaltinq şirkəti “Brand Finance” beynəlxalq yarımkeçirici çip istehsalçılarının dəyərinə görə sıralamasını əks etdirən “Semiconductors 20” hesabatını dərc edib.
Dünyanın ən dəyərli çip istehsalçısı Kaliforniya mərkəzli “Intel” olub. Baxmayaraq ki, şirkətin brend dəyəri ötən ilə nisbətən 20% azalıb, 25.6 milyard dollar olub.
Tayvanın “TSMC” şirkəti 66% bahalaşaraq, 20.5 milyard dollar ilə ikinci yerdə qərarlaşıb. Üçüncü olan “NVIDIA” brendinin ümumi dəyəri isə 100% artaraq 16.1 milyard dollar olub.
Sıralamada dördüncü və beşinci yerlərlərə isə müvafiq olaraq, “SKHynix” (9.4 milyard $) və “Qualcomm” (7.8 milyard $) şirkətləri layiq görülüb.
2021-2022 illəri aralığında ən çox dəyər qazanan yarımkeçirici istehsalçı şirkət isə “AMD” olub. Belə ki, şirkət bu dövr ərzində 122% dəyər qazanaraq siyahıda 8-ci yerə yüksələ bilib.