“Facebook” şirkəti 4 oktyabr tarixində bütün sosial media tətbiqetmələrində problemlər yaşasa da, rüblük maliyyə göstəriciləri proqnozlaşdırılandan yüksək olub. Belə ki, cari ilin üçüncü rüb maliyyə göstəricilərinə əsasən, şirkətin mənfəət göstəricisi 2020-ci ilin üçüncü rübünə nisbətdə 35% artaraq 7.8 milyard dollardan 9.2 milyard dollara yüksəlib. Bu isə, səhmbaşına 3.22 dollar gəlir deməkdir. Qeyd edək ki, proqnozlar səhmbaşına 3.19 dollar səviyyəsində idi.
Şirkətin sosial media tətbiqetmələri olan “Facebook”, “Instagram” və “Whatsapp” istifadəçiləri proqnozlaşdırılanla üst-üstə düşüb. Belə ki, gündəlik aktiv istifadəçilərin sayı 1.93 milyard nəfər, aylıq olaraq isə 2.91 milyard nəfər olub.
Məlumat üçün qeyd edək ki, şirkətin 28 oktyabr tarixinə planlaşdırdığı rebrendinq prosesindən sonra istifadəçilərinin daha da artması ehtimal edilir. Rebrendinq prosesi ilə bağlı buradan ətraflı məlumat əldə edə bilərsiniz.