ABŞ Federal Ehtiyat Sisteminin (FED) İdarə Heyətinin üzvü Stiven Miran Ağ Evin İqtisadi Məsləhətçilər Şurasındakı (CEA) vəzifəsindən istefa verib. Bu addım onun Senat qarşısında verdiyi öhdəliyin yerinə yetirilməsi kimi qiymətləndirilir.
Miran ötən il Prezident Donald Tramp tərəfindən FED-in İdarə Heyətində yaranan gözlənilməz boşluğu doldurmaq üçün təyin edilmişdi. O vaxtdan etibarən CEA-dakı vəzifəsindən ödənişsiz məzuniyyətdə idi. Rəsmi FED səlahiyyət müddəti 31 yanvar 2026-cı ildə başa çatsa da, qanunvericiliyə əsasən, yerinə yeni namizəd təsdiqlənənədək vəzifəsini icra edə bilər.
Onun eyni zamanda həm FED, həm də Ağ Ev strukturlarında təmsil olunması Demokrat senatorlar tərəfindən tənqid olunmuş, bu vəziyyətin FED-in müstəqilliyinə xələl gətirə biləcəyi vurğulanmışdı. Miran isə daha əvvəl bildirmişdi ki, hüquqi məsləhətlərə əsasən, CEA-dan istefa verməsi tələb olunmurdu, çünki FED-dəki təyinatın qısa müddətli olacağı gözlənilirdi.
İstefa qərarı Prezident Trampın keçmiş FED rəhbəri Kevin Uorşu Mərkəzi Bankın yeni sədri vəzifəsinə namizəd göstərməsindən bir neçə gün sonra açıqlanıb. Uorşun təsdiqlənməsi Miranın hazırda tutduğu yerin rəsmi şəkildə boşaldılması demək olacaq, lakin bunun üçün Senatın razılığı şərtdir.
Mütəxəssislər hesab edirlər ki, bu dəyişikliklər ABŞ-da pul-kredit siyasətinin gələcək istiqaməti baxımından mühüm siqnallar verir.