Aprelin 26-da kənd təsərrüfatı sahəsində fəaliyyət göstərən fermerlərin ehtiyaclarının öyrənilməsi məqsədilə onlayn görüş keçirilib. Kiçik və Orta Biznesin İnkişafı Agentliyinin (KOBİA) təşkilatçılığı ilə dövlət-sahibkar əməkdaşlığı platforması çərçivəsində təşkil olunmuş onlayn tədbirdə Kənd Təsərrüfatı Nazirliyinin, “Azərbaycan Meliorasiya və Su Təsərrüfatı” ASC-nin, Aqrar Kredit və İnkişaf Agentliyinin (AKİA), Aqrar Sığorta Fondunun və İqtisadiyyat Nazirliyinin Sahibkarlığın İnkişafı Fondunun nümayəndələri və 30-a yaxın sahibkarlıq subyeki iştirak edib.
Onlayn görüşdə əkin sahələrinin suvarılması zamanı yaranan problemlər, güzəştli kreditlərin alınması, artezian quyularının qazılması və subsidiyaların verilməsi barədə sahibkarların sualları ətrafında müzakirələr aparılıb, Aqrar Sığorta Fondu tərəfindən kənd təsərrüfatı məhsullarının risklərə qarşı müdafiəsinə dair təqdimat keçirilib.