“Fitch Ratings” beynəlxalq reytinq agentliyi Azərbaycan Beynəlxalq Bankının (ABB) uzunmüddətli emitent defoltu reytinqini (LT IDR) “BB”, həyat qabiliyyəti reytinqini (VR) isə “bb” səviyyəsində təsdiqləyib. Reytinqlər üzrə proqnoz müsbət olaraq saxlanılıb.
BBN.az xəbər verir ki, Agentlik bildirib ki, müsbət proqnoz ABB-nin kredit portfelində ortamüddətli dövrdə mülayim artım gözləntilərini əks etdirir. Bankın güclü daxili bazar mövqeyi, balans strukturu və etibarlı maliyyə göstəriciləri əsas üstünlüklər olaraq qiymətləndirilsə də, Azərbaycanın neftdən asılı iqtisadiyyatına qarşı həssaslıqla tarazlaşdırılır.
Məlumata görə, 2025-ci ilin ilk yarısının sonuna ABB sektorun aktivlərinin 25 %-nə, kreditlərin isə 23 %-nə nəzarət edib. Bankın kredit portfeli pərakəndə və korporativ seqmentlər arasında balanslı olub, qeyri-işlək kreditlərin payı 4,6 %-ə çatıb. Bununla belə, bu göstərici ehtiyatlarla tam təmin olunub.
“Fitch” hesab edir ki, ABB-nin maliyyələşməsi əsasən depozitlər hesabına təmin olunur, likvid ehtiyatları isə əhəmiyyətli səviyyədədir. Bankın gəlirliliyi yaxın illərdə bir qədər zəifləsə də, dayanıqlı qalacağı gözlənilir. Agentlik həmçinin kredit artımının 2025–2026-cı illərdə 15–20 % diapazonunda olacağını proqnozlaşdırır.