Rəqəmsal İnkişaf və Nəqliyyat Nazirliyi tabeliyində fəaliyyət göstərən İnformasiya və Kommunikasiya Texnologiyaları Agentliyi (İKTA) “Broadband Mapping” (Genişzolaqlı İnternet Xəritələmə) və “E-Connection” (Elektron Qoşulma) platformalarını istifadəyə verəcək.
Məlumata görə, yeni xidmətlər istifadəçilərə internet provayderlərini vahid platforma üzərindən seçmək, müqayisə etmək və birbaşa qoşulma müraciəti göndərmək imkanı yaradacaq.
Layihənin təqdimatı çərçivəsində telekommunikasiya operatorları və provayderləri ilə görüş keçirilib. İKTA-nın İdarə Heyətinin sədr müavini Ceyhun Hüseynzadə təşəbbüsün bazarın ekosisteminə köklü təsir göstərəcəyini bildirib.
“Broadband Mapping” platforması vasitəsilə vətəndaşlar və biznes subyektləri ünvanları üzrə real xidmət göstərən provayderləri interaktiv xəritə üzərindən müəyyən edə biləcəklər. Onu tamamlayan “E-Connection” xidməti isə:
-
müxtəlif provayderlərin tarif və texniki göstəricilərinin şəffaf müqayisəsi;
-
seçilmiş provayderə saniyələr ərzində elektron müraciət göndərilməsi;
-
müraciətin qəbulundan xidmətin aktivləşməsinə qədər prosesin şəxsi kabinetdə izlənməsi;
-
rəqəmsal giriş və gücləndirilmiş elektron imza vasitəsilə hüquqi etibarlılıq kimi imkanlar təqdim edəcək.
Qeyd olunub ki, model Federal Communications Commission (FCC) və BEREC-in qabaqcıl təcrübələrinə əsaslanır, həmçinin Dünya Bankının “B-READY” hesabatında qiymətləndirilən “məlumatlı seçim” və “şəffaf bazar” meyarlarına uyğundur.
Layihəyə qoşulan operatorlar əlavə xərc çəkmədən dövlət platformasında tanıtım və müştəri bazasına birbaşa çıxış imkanı əldə edəcəklər. Məlumatlarını təqdim etməyən provayderlər isə xəritədə əks olunmayacaq.
Hazırda test rejimində olan “E-Connection” xidmətinin 2026-cı ilin mart ayında tam istifadəyə verilməsi planlaşdırılır.