Kriptovalyuta konsepsiyasının sürətlə yayıldığı Qərbi Avropa ölkələrindən olan İsveçrədə kripto investisiya alətlərinin inkişafı yönündə daha bir addım atılıb. Belə ki, uzun müddətdir müzakirələri gedən kriptovalyuta fondu bugün etibarilə İsveçrənin maliyyə tənzimləmə orqanı (FINMA) tərəfindən təsdiqlənib.
“Crypto Market Index Fund” adı altında fəaliyyət göstərəcək fond İsveçrə mərkəzli “Crypto Finance” şirkəti tərəfindən yaradılıb. Fondun investisiya fəaliyyəti “PvB Pernet von Ballmoos AG” investisiya şirkəti və “SEBA Bank AG” bankı tərəfindən idarə ediləcək.
Kriptovalyuta fondunun əsas məqsədi yerli və xarici kriptovalyuta bazarında fond vəsaiti hesabına aktivlərin alınıb satılması ilə yanaşı, yerli kriptovalyutalar üçün bazarda bençmark yaradılmasına dəstək olmaqdır.