Mayın 22-də Azərbaycan Sahibkarlar Konfederasiyası (ASK) ilə Beynəlxalq Əmək Təşkilatının (BƏT) Şərqi Avropa və Mərkəzi Asiya üzrə regional ofisinin nümayəndələri arasında görüş keçirilib. Görüşdə əsas məqsəd layiqli əməyin təmin olunması, COP-29-da BƏT üzvlərinin iştirakı və BƏT ilə ASK arasında qarşıda duran birgə fəaliyyət məsələləri müzakirə olunub.
Konfederasiyanın prezidenti Məmməd Musayev ölkəmizdəki biznes mühiti, Baş Kollektiv Saziş və Üçtərəfli Komissiya çərçivəsində görülən işlərə dair ətraflı məlumat verib.
Azərbaycan Sahibkarlar Konfederasiyasının son illərdəki fəaliyyətinə BƏT-in xüsusi diqqət yetirdiyini vurğulayan qurumun Şərqi Avropa və Mərkəzi Asiya üzrə regional ofisinin direktor müavini Mixail Puşkin, “Daha faydalı və səmərəli işlər görürsünüz. Konfederasiya haqqında beynəlxalq ekspertlərin rəyləri də müsbətdir”, – deyə vurğulayıb.
O, COP-29 çərçivəsində BƏT-in ASK ilə birgə fəaliyyətdə maraqlı olduğunu bildirib və daha sıx əməkdaşlıq şəraitində işləməyi təklif edib.
M.Musayev bildirib ki, Beynəlxalq İşəgötürənlər Təşkilatı ilə birlikdə COP-29-da aktiv iştirakla bağlı razılıq əldə olunub və Konfederasiya bu proseslərdə BƏT ilə də əməkdaşlığa hazırdır.