BBN.az xəbər verir ki, Milli Məclis “İpoteka haqqında” qanuna dəyişiklikləri üçüncü oxunuşda qəbul edib. Dəyişikliklərə əsasən, ipoteka saxlayanlar ipotekaya dair tələblərin ödənilməsində üstünlük hüququnu müqavilə əsasında dəyişdirə biləcəklər.
Layihəyə görə, üstünlük hüququnun dəyişdirilməsi barədə müqavilə notariat qaydasında təsdiqlənməli və dövlət reyestrində qeydiyyata alınmalıdır.
Yeni mexanizmə əsasən, ipotekaya dair tələblərin ödənilməsində üstünlük hüququ ipoteka saxlayanlar arasında dəyişdirildikdə, bu hüquqlar daşınmaz əmlakın dövlət reyestrində və daşınar əmlakın rəsmi reyestrində sənədlərin təqdim edildiyi gündən etibarən 3 iş günü müddətində qeydə alınacaq.
Qanuna əsasən, üstünlük hüququ dəyişdirildikdə dövlət rüsumunu həmin hüququ əldə edən ipoteka saxlayan ödəyəcək.
Bu dəyişikliklərin məqsədi ipoteka münasibətlərində hüquqi mexanizmlərin daha çevik və səmərəli tətbiqinə nail olmaqdır. Qeydiyyat prosesi nəticəsində üstünlük hüququnun dövlət səviyyəsində tanınması və təsdiq edilməsi təmin ediləcək.
Qanun layihəsi müzakirələrdən sonra səsverməyə çıxarılaraq üçüncü oxunuşda qəbul edilib.