Hazırda Naxçıvan, Quba, Sabirabad, Sumqayıt, Gəncə və Masallıda DOST xidmətləri infrastrukturunun qurulması məqsədilə layihələndirmə və təmir-tikinti işləri davam etdirilir.
Bu barədə Əmək və Əhalinin Sosial Müdafiəsi Nazirliyinin tabeliyində fəaliyyət göstərən DOST Agentliyinin Müşahidə Şurasının növbəti iclasında məlumat verilib.
İclasda çıxış edən Şuranın sədri, əmək və əhalinin sosial müdafiəsi naziri Anar Əliyev bildirib ki, Prezident İlham Əliyevin müvafiq Fərmanına əsasən indiyədək Bakı şəhərində, Abşeron və Bərdə rayonlarında 7 DOST Mərkəzi, Zəngilanın Ağalı kəndində “Smart DOST” məntəqəsi, Qarabağ Regional DOST Mərkəzinin Şuşa filialı, eləcə də Kəlbəcər və Füzuli DOST məntəqələri istifadəyə verilib.
Qeyd olunub ki, Birinci vitse-prezident Mehriban Əliyevanın təşəbbüsü ilə yaradılan DOST konsepsiyası sosial xidmətlərin “bir pəncərə” prinsipi əsasında, müasir və tam şəffaf mexanizmlərlə təqdim edilməsinə imkan yaradır. Bu günədək DOST mərkəzlərində 4 milyondan çox vətəndaşa xidmət göstərildiyi, vətəndaş məmnunluğunun isə 98,7 faiz təşkil etdiyi vurğulanıb.
Bildirilib ki, gələcəkdə Azərbaycanın bütün bölgələrinin DOST xidmətləri ilə əhatə olunması nəzərdə tutulur.
İclasda DOST Agentliyinin İdarə Heyətinin sədri Fərid Məmmədov qurumun 2025-ci il üzrə fəaliyyət hesabatını təqdim edib, strateji hədəflər və prioritet istiqamətlər müzakirə olunub.