Qırğızıstan dollarla ifadə olunan istiqrazların uğurla yerləşdirilməsindən sonra beynəlxalq maliyyə bazarlarında mövqelərini daha da gücləndirməyi planlaşdırır. Ölkə borc öhdəliklərinin emissiyasını davam etdirməyi, eyni zamanda qızıl ilə təmin edilmiş sabit kriptovalyutanın (steyblkoin) istifadəyə verilməsini nəzərdə tutur.
Məlumata görə, Qırğızıstan hökuməti may ayında avroistiqrazların satışı vasitəsilə 700 milyon dollar vəsait cəlb edib. Bununla da ölkə qlobal investorların diqqətini cəlb etməyə çalışan Mərkəzi Asiya dövlətlərinin sırasına qoşulub. Maliyyə Nazirliyinin açıqlamasına əsasən, dövlətə məxsus “Eldik Bank” fevral ayında ilkin istiqraz yerləşdirilməsinə hazırlaşır və hazırda banklarla danışıqların yekun mərhələsindədir.
Qeyd olunur ki, Özbəkistan və Qazaxıstan da daxil olmaqla region ölkələri kredit reytinqlərinin yaxşılaşması, islahatlar və maliyyə mənbələrinin şaxələndirilməsi hesabına qlobal bazarlarda fəallıqlarını artırırlar. Bu çərçivədə “Qırğızaltın”, “Kumtor Gold”, “Qırğızıstan Hava Limanları” və “Eldik Bank” istiqraz buraxılışı imkanlarını nəzərdən keçirir.
2030-cu ildə ödəniş müddəti bitən ilk avroistiqraz buraxılışı S&P Global Ratings tərəfindən investisiya səviyyəsindən dörd pillə aşağı reytinq alıb. Bununla belə, ümumi tələbat 2,1 milyard dolları ötüb. Tələbin 45%-i Avropa investorlarının, 30%-i isə Böyük Britaniya və İrlandiyadan olan investorların payına düşüb.
Hökumət suveren istiqrazların emissiyasını davam etdirməyi planlaşdırır. Hazırda Qırğızıstanda dövlət borcunun ÜDM-ə nisbəti 42,7% təşkil edir və iqtisadi artım, həmçinin mövcud öhdəliklərin ödənilməsi hesabına bu göstəricinin 2030-cu ilə qədər 23%-ə enəcəyi gözlənilir.
Avroistiqrazların ümumi həcmi 1,7 milyard dollar qiymətləndirilir. Növbəti emissiyanın vaxtı bazar şərtlərindən asılı olacaq. Bununla yanaşı, islam və “yaşıl” istiqrazların buraxılışı da müzakirə olunur, lakin əsas prioritet ənənəvi avroistiqrazlardır.
İlk istiqraz yerləşdirilməsindən əldə olunan vəsait enerji layihələri ilə məşğul olan “Eldik” şirkətinin maliyyələşdirilməsinə yönəldilib. Şirkət ümumi dəyəri 1,5 milyard dollardan çox olan layihələri nəzərdən keçirir.
Bununla yanaşı, Qırğızıstan rəqəmsal maliyyə alətlərinin inkişafına da xüsusi önəm verir. Noyabr ayında Maliyyə Nazirliyi qızıl ilə təmin edilmiş və dollara 1:1 nisbətində bağlanmış USDKG adlı steyblkoini istifadəyə verib. Emissiyanın həcmi 50 milyon dollar olub, tokenlər Tron və Ethereum blokçeynlərində buraxılıb. Təminat məqsədilə qızıl mərkəzi bankla birgə satın alınıb.
Virtual aktivlərin emissiyası ilə məşğul olan şirkətin baş direktoru Biybolot Mamıtov bildirib ki, USDKG sərhədlərarası əməliyyatlar üçün mühüm alətə çevriləcək və Qırğızıstana kapital və investisiya axınını sürətləndirəcək.
Proqnozlara görə, 2030-cu ilə qədər qlobal steyblkoin bazarının həcmi 4 trilyon dollara çata bilər. Şirkət gələcəkdə səhmlərin ilkin açıq yerləşdirilməsi (IPO) imkanını da nəzərdən keçirir.