Qlobal bazarlarda qeyri-müəyyənlik artdıqca qızıl bahalaşmaqda davam edir. ABŞ Prezidenti Donald Trump-ın yeni qlobal tarif qərarları və zəif makroiqtisadi göstəricilər təhlükəsiz aktivlərə tələbi artırıb. Spot qızılın qiyməti 0,8% artaraq unsiya üçün 5 143 dolları ötüb. ABŞ qızıl fyuçersləri isə 1,7% yüksələrək 5 165 dollar səviyyəsinə çatıb. Beləliklə, qiymətlər ardıcıl dördüncü sessiyada artım göstərib. ABŞ Ali Məhkəməsinin əvvəlki geniş tarif proqramını ləğv etməsindən sonra Tramp 150 gün müddətinə 10%-lik idxal rüsumu tətbiq edib. Daha sonra bu göstərici 15%-ə yüksəldilib. Tariflərin artırılması qlobal ticarət zəncirlərində pozuntular və mümkün cavab tədbirləri ilə bağlı narahatlıqları gücləndirib. İnvestorlar isə ənənəvi təhlükəsiz limanlara – qızıl və ABŞ dövlət istiqrazlarına yönəlib. Son açıqlanan məlumatlara görə, ABŞ-da ÜDM IV rübdə illik ifadədə 1,4% artaraq əvvəlki rüblə müqayisədə kəskin zəifləmə göstərib.
Eyni zamanda, Federal Reserve-in üstünlük verdiyi inflyasiya göstəricisi olan PCE indeksi illik 2,9% artıb. Əsas (core) göstərici isə 3% ətrafında qalaraq Mərkəzi Bankın 2%-lik hədəfindən yüksək səviyyədədir.
Zəifləyən iqtisadi artım və davamlı inflyasiya qızılın həm qoruyucu aktiv, həm də dəyər saxlayan alət kimi cəlbediciliyini artırır. ABŞ və İran arasında gərginliyin artması da ötən həftə qızılın 1%-dən çox bahalaşmasına səbəb olmuşdu. Analitiklər bildirirlər ki, geosiyasi risklər və ticarət müharibəsi fonunda qızıl yaxın müddətdə yüksək səviyyələrdə qalmağa davam edə bilər.