Son günlərdə digər valyutalarla qarşılaşdırmada sürətlə dəyər itirməsi səbəbindən hamının diqqət mərkəzində olan Türkiyə lirəsi ilə bağlı hökumətin qərarı bəlli olub. 2022-ci ildə Türkiyə hökuməti tərəfindən həyata keçirilməsi planlaşdırılan fəaliyyətlərin siyahısını özündə cəmləşdirən “Cumhurbaşkanlığı Yıllık Programı”nında rəqəmsal türk lirəsinin istifadəyə verilməsi də öz yerini alıb.
Türkiyə Mərkəzi Bankı (TCMB), Xəzinədarlıq və Maliyyə Nazirliyi və TÜBİTAK tərəfdaşlığı nəticəsində ərsəyə gətirilən rəqəmsal lirə layihəsinin test mərhələsinin gələn ilə qədər sonlandırılması planlaşdırılıb. Blokçeyn platforması üzərindən əməliyyatlara imkan tanıyacaq rəqəmsal lirənin ilkin dövriyyəyə buraxılış həcmi və baza dəyəri açıqlanmasa da, sözügedən valyutanın beynəlxalq ticarət əməliyyatlarında istifadə ediləcəyi qeyd edilib. Məlumat üçün qeyd edək ki, Türkiyə lirəsi son olaraq dollar qarşısında 1.36% dəyər itirərək 9.6 səviyyəsinə çatıb.