ABŞ mərkəzli “JPMorgan” bankı Rusiya Federasiyasından iki avrobond üzrə kupon ödənişlərinin alındığını açıqlayıb. Müvafiq olaraq 2023 və 2043-cü ilədək müddətli avrobondların emissiyası üzrə 117 milyon dollarlıq kupon ödənişi USD valyutasında həyata keçirilib. Kupon ödənişləri “Citi” tərəfindən həyata keçiriləcək yoxlamalardan sonra investorlara yönəldiləcək.
14 mart tarixində Rusiyanın Maliyyə Naziri Anton Siluanov ictimaiyyətə açıqlamasında vurğulamışdı ki, Rusiya Mərkəzi Bankının qızıl-valyuta ehtiyatlarının Qərbin sanksiyaları səbəbindən dondurulması xarici valyutaya əlçatanlığın çətinləşməsinə gətirib çıxardığından dövlət borcunun rubl və ya dollar ilə ödənilməsi sual altında qalır.
Məlumat üçün qeyd edək ki, rus rublu bu il dollar qarşısında 45%-dən çox dəyər itirib və 1998-ci ildən bu yana qeydə alınan ən aşağı səviyyəsinə çatıb. Digər tərəfdən isə, Rusiyanın faiz ödənişlərini həyata keçirməməsi və ya yerli valyuta ilə ödəniş cəhdi defolta gətirib çıxara bilər.