“S&P Global Ratings” beynəlxalq reytinq agentliyi “Azər-Türk Bank” ASC (ATB) üzrə uzunmüddətli və qısamüddətli emitent kredit reytinqlərini “B+/B” səviyyəsində təsdiqləyib, proqnozu isə sabit saxlayıb.
Qərar bankın SOCAR tərəfindən 51% payla alınmasından sonra formalaşan yeni strategiya mərhələsində maliyyə və biznes göstəricilərində ciddi dəyişikliklərin gözlənilməməsi ilə əsaslandırılıb. SOCAR-ın ATB-də pay alması 2025-ci ilin oktyabrında korporativ reyestr və nizamnamə dəyişiklikləri yolu ilə rəsmiləşdirilib. Hazırda yeni idarəetmə komandası fəaliyyət göstərsə də, baş icraçı direktor (CEO) vəzifəsi vakant olaraq qalır.
S&P bildirir ki, bank SOCAR-la əməliyyat bankçılığına, eləcə də qeyri-neft sektorunda kiçik və orta sahibkarlığın kreditləşdirilməsinə fokuslanan yeni strategiya üzərində işləyir. Agentlik bu strategiyanın bankın bazar mövqeyinə və gəlirliliyinə real təsirini elan olunduqdan sonra qiymətləndirəcək.
Reytinq agentliyinin proqnozuna əsasən, növbəti 12 ay ərzində ATB-nin kapitallaşma və risk mövqeyi əsasən sabit qalacaq. Risklə ölçülmüş kapital göstəricisinin (RAC) 2026-cı ildə 6–7,5% aralığında olacağı gözlənilir. Bu göstərici 2024-cü ilin sonunda 6,6% təşkil edib və əsasən kredit portfelinin artım tempindən, eləcə də mümkün kapital dəstəyindən asılı olacaq.
S&P eyni zamanda xəbərdarlıq edir ki, əvvəlki illərdə sürətli kredit artımı fonunda problemli kreditlərin payı yüksələ bilər. Belə ki, problemli kreditlərin payı 2024-cü ilin sonunda 2,2% olduğu halda, 2025-ci ilin sentyabr ayının sonuna 3,2%-ə yüksəlib və növbəti 12–24 ayda 4%-ə çata bilər. Artım əsasən korporativ və istehlak kreditləri üzrə keyfiyyətin zəifləməsi ilə əlaqələndirilir.
Agentlik ATB-ni SOCAR üçün strateji əhəmiyyət daşımayan törəmə qurum kimi qiymətləndirir və bu səbəbdən reytinqlərdə SOCAR tərəfindən əlavə dəstək amili nəzərə alınmır. Hökumətin bankdakı payının 75%-dən 24%-ə endirilməsi fonunda dövlət dəstəyi ehtimalı da aşağı qiymətləndirilir.
S&P qeyd edir ki, yeni strategiya bankın kapitallaşmasına və aktiv keyfiyyətinə mənfi təsir göstərərsə və ya SOCAR-ın mülkiyyəti real biznes üstünlüklərinə çevrilməzsə, reytinqlər aşağı salına bilər. Eyni zamanda, yaxın 12 ay ərzində reytinq artımı ehtimalı aşağı hesab olunur.