Mərkəzi və Şərqi Avropa ölkələri Azərbaycan qazının regiona çatdırılma imkanlarını artırmaq üçün əməkdaşlığı gücləndirir.
S&P Global Energy məlumatına görə, region ölkələri “Şaquli Qaz Dəhlizi” təşəbbüsü çərçivəsində nəqliyyat gücünü artırmağa çalışır. Məqsəd Yunanıstan və Türkiyədəki terminallar vasitəsilə yenidən qazlaşdırılmış mayeləşdirilmiş təbii qazın (LNG) və Azərbaycandan tədarük olunan boru qazının daha böyük həcmlərlə Mərkəzi və Şərqi Avropaya, o cümlədən Ukraynaya çatdırılmasıdır.
Bildirilir ki, Yunanıstanın infrastruktur şirkəti AKTOR Group-un əsas səhmdarı olduğu Atlantic SEE LNG Trade Cənub-Şərqi Avropa ölkələrinə ABŞ LNG tədarükü üzrə dörd memorandum imzalayıb. Razılaşmalar aşağıdakı həcmləri əhatə edir:
-
Bolqarıstanın Bulgargaz — ildə 1,5 milyard kubmetr
-
Ukraynanın Naftogaz — ildə 1 milyard kubmetr
-
Albaniyanın İnfrastruktur və Enerji Nazirliyi — ildə 1 milyard kubmetrədək
-
Bosniya və Herseqovinanın Aluminij Industries və MT Abraham Group — 0,5 milyard kubmetr
Müqavilələrin müddəti 20 ilədək nəzərdə tutulub.
Atlantic SEE ötən il AKTOR Group (60%) və Yunanıstanın qaz və LNG idxalçısı DEPA (40%) tərəfindən yaradılıb. Şirkət noyabr ayında ABŞ-ın Venture Global ixracatçısı ilə 20 illik LNG offtake müqaviləsi imzalayıb. Sazişə əsasən, 2030-cu ildən etibarən hər il ən azı 500 min ton LNG tədarük ediləcək və həcmlərin artırılması imkanı mövcuddur.
S&P Global Energy-nin məlumatına görə, 2025-ci ildə Avropa İttifaqına idxal olunan təxminən 106 milyon ton LNG-nin 2,3 milyon tonu Yunanıstan vasitəsilə daxil olub. Bu həcmin təxminən 2 milyon tonu ABŞ mənşəli olub.