BBN.az xəbər verir ki, S&P Global Ratings 2026-cı il üzrə regional bank sektoru hesabatında Azərbaycan bank sistemində artımın daha balanslı və idarə olunan mərhələyə daxil olduğunu qeyd edir.
Hesabatda bildirilir ki, əvvəlki illərdə sürətli kredit genişlənməsindən sonra bazarda dayanıqlı tempə uyğunlaşma müşahidə olunur. Bu proses bankların risklərin idarə olunmasına və portfel keyfiyyətinə daha çox diqqət ayırmasına şərait yaradır.
S&P-yə görə, ölkədə maliyyə sektorunun inkişafı üzrə qəbul edilmiş 2024–2026-cı illər strategiyası bank nəzarətinin gücləndirilməsinə, riskə əsaslanan tənzimləmənin tətbiqinə və beynəlxalq standartlara uyğunlaşmaya yönəlib. Bu yanaşma sektorun institusional möhkəmliyini artırır.
Hesabatda həmçinin qeyd olunur ki, kredit bazarında əsas aktivlik pərakəndə seqmentdə qalmaqla yanaşı, daşınmaz əmlak sektorunda qiymət artımları sabit və nəzarətli səviyyədə davam edir. Bu isə maliyyə sabitliyi baxımından müsbət amil kimi qiymətləndirilir.
S&P vurğulayır ki, bank sektorunda gələcək dövrdə artım daha çox keyfiyyət, səmərəlilik və risklərin balanslaşdırılması üzərində qurulacaq ki, bu da uzunmüddətli perspektivdə maliyyə sisteminin davamlılığını gücləndirir.