Türk Dövlətləri Təşkilatı (TDT) çərçivəsində fəaliyyət göstərən kosmik qurumların işçi qrupu Daşkənd şəhərində keçirilən iclasda “TDT çərçivəsində Kosmik Sənaye Əməkdaşlığı potensialının inkişafına dair Saziş” layihəsini nəzərdən keçirib.
Görüş zamanı iştirakçı ölkələrin nümayəndə heyətləri yekun qeydlərini təqdim edib, kosmik texnologiyalar və sənaye istehsalı sahəsində uzunmüddətli əməkdaşlıq üçün hərtərəfli hüquqi və institusional bazanın formalaşdırılmasına hazır olduqlarını bildiriblər.
Bununla yanaşı, iclas çərçivəsində “CubeSat” formatlı (OTS-SAT, 12U) peykin istehsal mərhələsinin başa çatdırılması və onun orbitə çıxarılması ilə bağlı məsələlər ətrafında fikir mübadiləsi aparılıb. Tərəflər sıx koordinasiyanın, qalan texniki işlərin vaxtında tamamlanmasının, həmçinin peyk sistemləri, yerüstü infrastruktur və məlumatların emalı istiqamətlərində əməkdaşlığın vacibliyini vurğulayıblar.
Eyni zamanda, Daşkənddə keçirilmiş TDT Kosmik Agentlikləri rəhbərlərinin 5-ci iclasında OTS-SAT peykinin istehsalının yekun mərhələləri və buraxılış prosesi müzakirə olunub. Tərəflər TDT-nin kosmik sahədə beynəlxalq mövqeyinin gücləndirilməsi məqsədilə böyük beynəlxalq platformalarda Türk Dünyası Kosmos Günlərinin təşkili təşəbbüsünü də diqqətə çatdırıblar.