ABŞ Prezidenti Donald Tramp Böyük Britaniyanı Çinlə iqtisadi əməkdaşlıqdan çəkinməyə çağırıb. Bu xəbərdarlıq Britaniyanın Baş naziri Keir Starmerin Pekinə səfəri və Çinlə münasibətlərin yenidən qurulmasını dəstəkləməsi fonunda səsləndirilib.
Tramp jurnalistlərə açıqlamasında Britaniyanın Çinlə yaxınlaşmasını “təhlükəli” adlandırıb. Prezident bu fikri Vaşinqtonda “Melania” filminin premyerası ərəfəsində səsləndirsə də, detallara varmayıb.
Eyni vaxtda Pekində səfərdə olan Keir Starmer Çin Prezidenti Si Cinpin ilə üç saatlıq danışıqlar aparıb. Britaniya lideri görüşdə bazarlara çıxışın genişləndirilməsi, tariflərin azaldılması və investisiya razılaşmalarını müzakirə etdiklərini bildirib.
Starmer Çin–Britaniya Biznes Forumunda çıxış edərək səfəri “istədiyimiz səviyyədə dialoq” kimi qiymətləndirib və viza rejiminin yumşaldılması, eləcə də viski tariflərinin azaldılmasını münasibətlərin inkişafı baxımından vacib addımlar adlandırıb.
Baş nazir vurğulayıb ki, Böyük Britaniya ABŞ və Çin arasında seçim etməyə məcbur deyil. Onun sözlərinə görə, London Vaşinqtonla müdafiə, təhlükəsizlik və ticarət sahələrində sıx əməkdaşlığı davam etdirir.
Qeyd edək ki, Tramp son aylarda müttəfiqlərinə qarşı sərt ticarət mövqeyi ilə diqqət çəkir. O, daha əvvəl Kanadanı Çinlə yaxınlaşmaya görə tariflərlə hədələmişdi.
ABŞ Ticarət naziri Hovard Latnik isə Britaniyanın Çinlə ticarət səylərinin uğurlu olacağına şübhə ilə yanaşaraq, Çinin ixrac baxımından çətin bazar olduğunu bildirib.