Elektron kommersiya sahəsi tranzaksiyaların çoxluğu səbəbindən kiber dələduzluq hücumları üçün daim əlverişli platforma olub. Lakin, ötən il tətbiqinə başlanılan yeni texnologiya ilə e-kommersiya sahəsində “fraud” hallarının həcmində kəskin azalma qeydə alınıb.
3DS adlanan kibertəhlükəsizlik protokolunun tətbiqi tranzaksiyalar zamanı ödəniş kartı sahibinə daha təhlükəsiz identifikasiya imkanı tanıyır. Eyni zamanda “two-factor authentication” funksiyasına sahib olan bu protokolun ilkin tətbiqi 2020-ci ilin birinci yarısına təsadüf edir.
Cari ilin birinci yarısında həyata keçirilən “fraud” hücumlarının sayına nəzər saldıqda, ötən ilin müvafiq dövrü ilə müqayisədə 36% azalıb, 3DS protokolundan istifadə isə 600% artıb. Bu barədə statistika, Nyu-York mərkəzli araşdırma və kibercinayətlər üzrə risk menecmenti şirkəti “LexisNexis Digital Identity Network” şirkətinin hesabatında qeyd olunub.
Hesabata əsasən, 2021-ci ilin birinci yarısında maliyyə xidmətləri sektoruna 683 milyon, e-kommersiya sferasına 189 milyon, media sahəsinə isə 351 milyon “fraud” hücumuna cəhd edilib.