İyulun 11-də Bakı Ekspo Mərkəzində “Yüksəliş” müsabiqəsinin final mərhələsi çərçivəsində keçirilən “Qarabağda ağıllı şəhər” tapşırığı üzrə müzakirələrdə Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov idarəçi rəhbər qismində iştirak edib.
“Yüksəliş” müsabiqəsinin Təşkilat Komitəsinin üzvləri və idarəçi rəhbərlərin müşahidəsi ilə təşkil olunmuş müzakirələrdə finalçıların Qarabağda “Ağıllı şəhər” konsepsiyası üzrə fikirləri öyrənilib, onlar idarəçi rəhbərlərin suallarını cavablandırıblar. Final iştirakçılarının tapşırıq üzrə təqdimatından sonra idarəçi rəhbərlər keys üzrə finalçıları qiymətləndiriblər.
Qeyd edək ki, “Yüksəliş” müsabiqəsi intellektual səviyyəsi və idarəçilik qabiliyyəti yüksək olan perspektiv rəhbər şəxslərin müəyyənləşdirilməsi, dəstəklənməsi və ölkədə kadr ehtiyatı bankının yaradılması məqsədilə təşkil olunub. Müsabiqənin final mərhələsi artıq başa çatıb.