Azərbaycanda dövlət dəstəyi ilə tətbiq edilən aqrar sığorta mexanizmindən faydalanan fermerlərin sayı artmaqdadır.
Aqrar Sığorta Fondunun məlumatına görə, 2023-cü ildə sığorta olunan fermer və təsərrüfatların sayı və toplanan sığorta haqları, sığortalanan əkinlərin sahəsi artır.
Fonddan verilən məlumata görə, ötən il Azərbaycanda sığortalanmış əkinlərin sahəsi 380 476 hektar olub ki, bu da 2022-ci ilin göstəricisi ilə müqayisədə 114 min hektar və ya 43% artıqdır.
Bitkiçilik sahəsindən toplanan sığorta haqlarının məbləği isə 13 milyon manat təşkil edərək əvvəlki ilin göstəricisini 4,2 milyon manat və ya 48% üstələyib.
Nəticədə fondun bitkiçilik üzrə qarşıladığı sığorta təminatı yarım milyard manatı keçərək 506 milyon manata yüksəlib.
2023-cü ildə ölkədə ən çox sığortalanan əkin sahələri buğda, arpa, pambıq və qarğıdalı əkinləri olub.
Ümumilikdə əkin sahələrinin sığortası üzrə sığorta müqavilələrinin sayı 47 minə yaxınlaşıb ki, bu da əvvəlki illə müqayisədə 4 min müqavilə artıqdır.
2023-cü ildə aqrar sığorta mexanizmi vasitəsilə 7800 baş kənd təsərrüfatı heyvanı sığorta edilib, 3,9 milyon manat sığorta haqqı toplanıb. Sığortalanmış heyvanlardlan 6 500 baş iribuynuzlu, 1300 baş isə xırdabuynuzlu mal-qaradır.
Heyvanların sığortası üzrə sığorta təminatının məbləği 36 milyon manat təşkil edib.
Xatırladaq ki, Azərbaycanda aqrar sığorta vasitəsilə əkin sahələri, kənd təsərrüfatı heyvanları və balıqçılıq təsərrüfatları sığorta edilir.
Bitkiçilik sığortasına taxıl və tarla bitkiləri, meyvə bağları, texniki bitkilər, tərəvəz və bostan bitkiləri, heyvanların sığortasına isə iri və xırda buynuzlu heyvanlar – inək və camışlar, qoyun və keçi təsərrüfatları daxildir.
Aqrar sığorta dövlət dəstəyi ilə təqdim olunur – fermerlərə dəstək məqsədilə hesablanmış sığorta haqqının 50%-ni fermerin əvəzinə dövlət ödəyir.