Azərbaycan Banklar Assosiasiyasının (ABA) nümayəndə heyətinin Koreyaya səfəri çərçivəsində Koreya Mərkəzi Bankı (Bank of Korea) ilə görüş keçirilib.
Görüş zamanı Koreya Mərkəzi Bankının Ödəniş və Hesablaşma Sistemləri Departamentinin Beynəlxalq Ödəniş Əməkdaşlığı Şöbəsinin rəhbəri Donghwee Kwon ölkənin monetar siyasəti, rəqəmsal ödəniş infrastrukturu, Mərkəzi Bank Rəqəmsal Valyutası (CBDC) ilə bağlı aparılan işlər və bank sektorunda tətbiq edilən müasir yanaşmalar barədə təqdimatla çıxış edib. Tərəflər CBDC ödəniş sistemlərinin inkişaf istiqamətləri, rəqəmsal maliyyə ekosistemi və bu sahədə təcrübə mübadiləsi imkanlarını müzakirə ediblər.
Görüşdə ABA-nın prezidenti Zakir Nuriyev, icraçı direktor Yunus Abdulov, eləcə də Azərbaycan Mərkəzi Bankı və ölkənin bir sıra aparıcı banklarını təmsil edən nümayəndələr iştirak ediblər.
Səfər çərçivəsində görüşlər davam edir və nümayəndə heyətinin qarşıdakı günlərdə Koreyanın digər aparıcı maliyyə qurumları ilə də müzakirələr aparması planlaşdırılır.