Məlum olduğu kimi, Azərbaycan Respublikasının Mərkəzi Bankı tərəfindən bank sektoru üzrə tələbin təşviqi məqsədilə tədbirlər həyata keçirilir, Azərbaycan Banklar Assosiasiyası (ABA) və onun törəmə müəssisəsi olan Azərbaycan Bank və Maliyyə Tədris Mərkəzi (ABFTC) tərəfindən müvafiq dəstək tədbirləri görülür.
Bu prosesin davamı olaraq, 26-27 sentyabr 2024-cü il tarixlərində ABFTC tərəfindən “MKOB-ların maliyyələşdirilməsində risklərin idarə edilməsi” və “MKOB Kreditləşməsi tənzimləmə çərçivəsi üzrə uyğunluq” mövzularında təlimlər keçirilmişdir.
İki günlük baş tutan təlim proqramında təlimçilər qismində “Bank Respublika”ASC-nin Risklərin idarəedilməsi departamenti-direktor müavini Haşım Əliyev, “Bank Respublika”ASC-nin Anderraytinq Departamenti, İstehlak kreditlərinin təhlili şöbəsinin müdiri Rasim Qasımov və “Kapital Bank” ASC-nin Korporativ kreditlərin təhlili şöbəsinin meneceri Nicat Mustafazadə çıxış etmişdirlər.
Xatırladaq ki, bundan əvvəl 15-16 iyul 2024-cü il tarixlərində “MKOB-ların maliyyələşdirilməsi mövzusuna giriş”, “Anderraytinq prinsipləri” mövzularında iki təlim təşkil edilmiş və 34 nəfər iştirak etmişdir.
Ümumilikdə isə bu tədbirlər çərçivəsində 63 nəfər bank əməkdaşı bu təlimlərdən faydalanmışdır.
Qeyd edək ki, Azərbaycan Bank və Maliyyə Tədris Mərkəzi (ABFTC) 2000-ci ildə Avropa Birliyi tərəfindən yaradılıb, Azərbaycan Banklar Assosiasiyasının törəmə müəssisəsidir. İndiyə qədər ABFTC tərəfindən 250-ə yaxın mövzu üzrə, 36 mindən çox dinləyiciyə 2500-ə yaxın təlim kursu təşkil edilmişdir.
Əlavə edək ki, Azərbaycan Respublikasının Mərkəzi Bankının Virtual Təhsil Platforması (edu.e-cbar.az) fəaliyyət göstərir. Platformaya iqtisadiyyat, bank-maliyyə sahəsində bilik və bacarıqların əldə edilməsini dəstəkləyən 40-dan çox ödənişsiz kurs yerləşdirilib. Virtual təhsil platfomasının interaktiv multimedia resurslarından istifadə etməklə, istənilən yerdə və istənilən zaman peşəkarlıq səviyyəsini təkmilləşdirmək mümkündür.
