Koronavirus pandemiyasının qlobal məcrada yayılması dünya ölkələrinin iqtisadiyyatlarına müxtəlif sahələrdə təsir göstərib. Sözügedən təsirlərin ən çox qeydə alındığı indikatorlardan biri isə istehlak qiymətləri indeksidir.
Dünyanın ən böyük iqtisadiyyatı olan ABŞ-dan da bu təsirlər yan keçməyib. Belə ki, cari ilin oktyabr ayında ölkədə 6.2% səviyyəsində inflyasiya göstəricisi qeydə alınıb. Bu isə, son 31 ildə qeydə alınan ən yüksək göstəricidir.
Vaşinqton mərkəzli “Pew Research Center” tərəfindən aparılan araşdırmalara görə, ABŞ üçüncü rübdə inflyasiya göstəricilərinə görə 46 ölkə arasında səkkizinci yerdə qərarlaşıb.
Məlumat üçün qeyd edək ki, tarixdə ilk dəfədir ki, “Dollar Tree” supermarketlər şəbəkəsi də inflyasiyadan təsirlənib. Belə ki, yarandığı ildən etibarən bütün məhsullarının satış qiyməti 1 dollar olan bu şəbəkə artıq bu həftədən etibarən bütün qiymətləri 1.25 dollar səviyyəsinə yüksəldir.