LONDON — Neftin dünya qiymətləri cümə axşamı yüksəlib. Qiymət artımına ABŞ-la ticarət danışıqları ətrafında yaranan nikbinlik və ölkənin xam neft ehtiyatlarında gözləniləndən daha böyük azalma səbəb olub.
Belə ki, Brent markalı neftin bir barreli 0,76% və ya 52 sent bahalaşaraq 69,03 dollara çatıb. ABŞ-ın WTI (West Texas Intermediate) markalı nefti isə 0,9% və ya 60 sent artaraq 65,85 dollar olub.
Rystad Energy-nin analitiki Yaniv Şah bildirib ki, “ABŞ-ın neft ehtiyatlarındakı azalma və ticarət danışıqlarındakı irəliləyişlər qiymətlərə dəstək verir”.
Digər tərəfdən, ABŞ Enerji Məlumatları İdarəsinin (EIA) məlumatına görə, ölkədə xam neft ehtiyatları ötən həftə 3,2 milyon barrel azalaraq 419 milyon barrelə enib. Bu göstərici, Reuters-in analitiklər arasında keçirdiyi sorğuda gözlənilən 1,6 milyon barrel azalmanı xeyli üstələyib.
Eyni zamanda, iki Avropa diplomatı Reuters-ə bildiriblər ki, ABŞ və Aİ arasında 15%-lik əsas gömrük tarifi və bəzi istisnaları əhatə edə biləcək yeni ticarət razılaşması müzakirə olunur. Bu, ABŞ-ın Yaponiya ilə əldə etdiyi razılaşmadan sonra növbəti iri ticarət sazişi ola bilər.