Görüşdə Azərbaycanın investisiya mühiti barədə məlumat verilib, birgə vebinar və tədbirlərin təşkili barədə müzakirə aparılıb.
İxracın və İnvestisiyaların Təşviqi Agentliyinin – AZPROMO-nun icraçı direktoru Yusif Abdullayev ABŞ-nin Beynəlxalq Ticarət Administrasiyasının istehsal üzrə katib köməkçisinin müavini Hezer Evansın rəhbərlik etdiyi nümayəndə heyəti ilə görüşüb. Müzakirələr zamanı tərəflər arasında ABŞ şirkətlərini Azərbaycan bazarında iştirak etməyə təşviq edəcək layihələrdən danışılıb.
ABŞ nümayəndə heyətinə Azərbaycanın ümumi iqtisadi mənzərəsi və investisiya mühiti, AZPROMO-nun fəaliyyəti, eləcə də xarici investorlar üçün yaradılan əlverişli biznes mühiti haqqında məlumat verilib. ABŞ şirkətlərinin Azərbaycan bazarına marağının artdığı və Beynəlxalq Ticarət Administrasiyasının ABŞ şirkətlərini Azərbaycanda yerli tərəfdaşlar tapmaqda dəstəklədiyi bildirilib.
Görüş zamanı təcrübə mübadiləsi aparmaq məqsədilə birgə vebinarlar və tədbirlərin təşkili barədə fikir mübadiləsi aparılıb.