Bu il iyulun 1-nə Azərbaycan Dövlət Neft Fondunun (ARDNF) investisiya portfelinin dəyəri 72 milyard 595,1 milyon ABŞ dolları təşkil edib.
BBN.az xəbər verir ki, bu göstərici ötən ilin eyni tarixi ilə müqayisədə 6 milyard 79,9 milyon ABŞ dolları və ya 9,1% artıb.
Hazırda ARDNF-in investisiya portfelinin 69,7%-i və ya 50 milyard 566,1 milyon ABŞ dolları dollarla ifadə olunan aktivlərdən ibarətdir. Bu, bir il əvvəlki göstərici ilə müqayisədə 3,2 faiz bəndi çoxdur.
Əvəzində portfeldə avronun payı 3,2 faiz bəndi azalaraq 17,7%-ə düşüb və 11 milyard 279,8 milyon dollar təşkil edib.
Hesabat dövründə ingilis funt sterlinqinin investisiya portfelindəki payı 0,2 faiz bəndi azalaraq 4,9%-ə, Çin yuanının payı isə 0,1 faiz bəndi azalaraq 2,3%-ə enib.
Yapon yeninin payı 0,1 faiz bəndi artaraq 1,5%-ə yüksəlib. Digər xarici valyutaların portfeldəki payı isə 0,2 faiz bəndi artaraq 3,9% təşkil edib.