Geosiyasi gərginlik və neft qiymətlərinin yüksəlməsi investorları narahat edir, Asiya indeksləri həftəni itkilərlə başa vurmağa hazırlaşır.
Asiya fond bazarları cümə günü enişlə bağlanmağa doğru irəliləyib. Buna səbəb ABŞ və İsrailin İranla müharibəsi fonunda gərginliyin azalmaması və bunun qlobal inflyasiyaya təsiri ilə bağlı narahatlıqların artmasıdır.
İnvestorların ehtiyatlı mövqeyi nəticəsində regionun əksər birjalarında satışlar üstünlük təşkil edib. Bazarlara həmçinin ABŞ fond bazarlarının əvvəlki sessiyada kəskin enməsi də mənfi təsir göstərib. Analitiklər hesab edir ki, enerji qiymətlərinin artması inflyasiyanı yüksəldə və bu da ABŞ Federal Ehtiyat Sisteminin faiz dərəcələrini yaxın vaxtlarda azaltmaq planlarını gecikdirə bilər.
Asiya ticarəti zamanı S&P 500 fyuçersləri təxminən 0,4% yüksəlsə də, region bazarlarında ümumi əhval-ruhiyyə zəif qalıb. Eyni zamanda, ABŞ-ın İran müharibəsinin yaratdığı təchizat risklərini kompensasiya etmək üçün Rusiya neftinə əlavə güzəştlər tətbiq etməsi xəbərləri fonunda neft qiymətləri bir qədər geriləyib.
Bununla belə, həftə ərzində enerji bazarında ciddi artım müşahidə olunub və Brent markalı neftin qiyməti bir barel üçün təxminən 100 dollar səviyyəsinə yaxın qalıb. Bu isə investorların inflyasiya və iqtisadi risklərlə bağlı narahatlıqlarını artırır.
Region üzrə ən böyük itkilər Yaponiya və Cənubi Koreya bazarlarında qeydə alınıb. Yaponiya Nikkei 225 və Cənubi Koreyanın KOSPI indeksləri gün ərzində təxminən 1,2% ucuzlaşıb. Yaponiyanın daha geniş bazarı əhatə edən TOPIX indeksi isə təxminən 0,6% geriləyib.
Analitiklər bildirirlər ki, Yaxın Şərqdə gərginlik davam etdiyi müddətdə qlobal bazarlarda volatillik yüksək qalacaq və enerji qiymətləri investorların əsas diqqət mərkəzində olacaq.