Avropa İttifaqı (Aİ) rəqəmsal ödəniş sistemlərini modernləşdirmək və avronun beynəlxalq maliyyə bazarındakı rolunu gücləndirmək üçün digital avro layihəsini sürətləndirməyə qərar verib. Bu addım, ABŞ Konqresinin “Genius Act” adlı qanunu qəbul etməsindən sonra atılıb. Yeni qanun stabilkoin bazarına sərt nəzarət gətirərək dolların rəqəmsal maliyyədə üstün mövqeyini daha da gücləndirib.
BBN.az xəbər verir ki, Aİ rəsmiləri hesab edirlər ki, digital avro avronun qlobal rəqəmsal ödəniş sistemlərində zəifləməsinin qarşısını almaq üçün strateji addımdır. Avropa Mərkəzi Bankı digital avronun texniki bazası ilə bağlı açıq blokçeyn platformalarının istifadəsini nəzərdən keçirir. Əvvəllər layihənin yalnız qapalı şəbəkələrdə tətbiqi planlaşdırılsa da, indi daha şəffaf və əlçatan model üstünlük təşkil edir. Bununla yanaşı, məxfilik və təhlükəsizlik məsələləri gündəmdə qalır.
Rəqəmsal avronun tətbiqi vətəndaşlara mərkəzi bank tərəfindən dəstəklənən təhlükəsiz rəqəmsal ödəniş vasitəsi təqdim edəcək və Avropa ödəniş bazarının ABŞ dolları və stabilkoinlər qarşısında rəqabət qabiliyyətini artıracaq. Hazırda layihənin hazırlıq mərhələsi icra olunur, qaydalar toplusu hazırlanır və ictimaiyyətlə məsləhətləşmələr aparılır. Avropa Mərkəzi Bankının prezidenti Christine Lagarde Avropa Parlamenti deputatlarını qanunvericilik işlərini sürətləndirməyə çağırıb.