Avropa İttifaqının (Aİ) fərdi məlumatların tənzimlənməsi orqanı Microsoft-un biznes və sosial şəbəkə platforması olan LinkedIn-i hədəflənmiş reklam təcrübələrinə görə 310 milyon avro cərimələyib.
BBN.az xəbər verir ki, Aİ-də şəxsi məlumatların qorunmasına cavabdeh olan İrlandiya Məlumatların Mühafizəsi Komissiyası (DPC) “LinkedIn” İrlandiya ilə bağlı araşdırmanın tamamlandığını açıqlayıb.
Açıqlamada bildirilib ki, araşdırma çərçivəsində “LinkedIn”in davranış analizi və hədəflənmiş reklam məqsədləri üçün şəxsi məlumatların emalı prosedurları araşdırılıb.
Qeyd olunub ki, Aİ Ümumi Məlumatların Mühafizəsi Qaydası (GDPR) çərçivəsində bu əməliyyatların qanuniliyi, ədalətliliyi və şəffaflığı ilə bağlı problemlər müəyyən edilib.
Araşdırmalar nəticəsində, fərdi məlumatların müvafiq hüquqi əsas olmadan işlənməsi və məlumat sahibinin hüquqlarının açıq və ciddi şəkildə pozulması aşkar olunub.
Bu səbəbdən LinkedIn-in 310 milyon avro cərimə olunduğu və platformaya fəaliyyətinin qanuna uyğunlaşdırılması üçün əmr göndərildiyi bildirilib.
