2025-ci ilin yanvar-mart aylarında Avropa ölkələrində qaz hasilatı 2021-ci ildən bəri ən aşağı səviyyəyə enib.
BBN.az bu barədə “Vedomosti” qəzetinə istinadən məlumat verir.
Birinci rübdə Avropada qaz hasilatı ötən ilin eyni dövrü ilə müqayisədə 8% azalaraq 47,7 milyard kubmetrə düşüb. Mart ayında isə hasilat ardıcıl beşinci ay azalma nümayiş etdirərək illik müqayisədə 4% geriləmişdir.
Əsas azalma Avropanın ən böyük qaz istehsalçısı olan Norveçdə qeydə alınıb — burada hasilat 7% azalaraq 31,5 milyard kubmetr təşkil edib. Böyük Britaniyada Bakton qaz terminalında aparılan təmir işləri səbəbindən istehsal 5% azalaraq 8,3 milyard kubmetrə enib. Hollandiyada isə yataqların tükənməsi və yeni layihələrə sərmayənin az olması səbəbilə hasilat 25% azalaraq 2,4 milyard kubmetrə düşüb.
Hasilatdakı azalmalara baxmayaraq, qaz istehlakı artıb. Birinci rübdə istehlak ötən ilin eyni dövrü ilə müqayisədə 9% artaraq 134,8 milyard kubmetrə çatıb. Yanvar-aprel ayları üzrə isə bu göstərici 160,6 milyard kubmetr təşkil edib ki, bu da illik müqayisədə 6% artım deməkdir.
Boru kəmərləri vasitəsilə qaz idxalı isə 9% azalaraq 55,51 milyard kubmetrə düşüb. Bununla yanaşı, mayeləşdirilmiş təbii qazın (LNG) tədarükü yanvar-mart aylarında 17%, apreldə isə 20% artım göstərib.
FG Finam analitiki Sergey Kaufmanın sözlərinə görə, Aİ-də sənaye sektorunda qaz istehlakının azalması və bərpa olunan enerjiyə keçidə baxmayaraq, növbəti beş ildə regionun qaz tələbatı artmağa davam edəcək.
Qeyd edək ki, 2025-ci ilin mart ayında Aİ ölkələri boru kəmərləri ilə Rusiyadan cəmi 340 milyon avro dəyərində qaz alıblar ki, bu da 1999-cu ildən bəri ən aşağı göstəricidir. Bu, fevral ayı ilə müqayisədə 42%-lik azalma deməkdir. Rusiyadan LNG tədarükü də mart ayında 17% azalaraq 830 milyon avro səviyyəsində qalıb.